fbpx

መንግስት ባጋጠመው የገንዘብ ችግር ምክንያት በ2011 በጀት አመት አዲስ የሚጀመር ፕሮጀክት አይኖርም ተባለ

Google+ Pinterest LinkedIn Tumblr +

መንግስት ባጋጠመው የገንዘብ ችግር ምክንያት በ2011 በጀት አመት አዲስ የሚጀመር ፕሮጀክት አይኖርም ተባለ፡፡ የተያዘው ረቂቅ በጀት ነባር ፕሮጀክቶችን ለማጠናቀቅ የሚሆን ነው ተብሏል፡፡ በመጪው አመት በተለየ ሁኔታ የግብር ገቢ በከፍተኛ ሁኔታ መሰብሰብ ካልተቻለ የተጀመሩ ፕሮጀክቶችን ማጠናቀቅም አስቸጋሪ እንደሚሆን የገንዘብና ኢኮኖሚ ትብብር ሚኒስትሩ ዶክተር አብርሃም ተከስተ ተናግረዋል፡፡

 

የውጪ እርዳታና ብድር የተገኘላቸው ውስን የመንገድ ፕሮጀክቶች ግን በ2011 ዓ/ም ይገነባሉ ተብሎ ውጥን ተይዟል፡፡ በመሆኑም በመጪው አመት የተጀመሩ ፕሮጀክቶችን ለመጨረስ 211 ቢሊየን ብር የግብር ገቢ መሰብሰብ ይጠበቅብናል ብለዋል ሚኒስትሩ፡፡

 

ባለፉት 2 አመታት አገሪቱ የሰበሰበችው የግብር ገቢ ዝቅተኛ በመሆኑ ለ2011 ዓ/ም ለፌዴራል መንግስት መደበኛ በጀት የተያዘው ገንዘብ ከዘንድሮ በ4 ነጥብ 4 በመቶ ዝቅ እንዲል የተደረገው ባለው የገቢ ችግር ምክንያት መሆኑንም አስረድተዋል፡፡

የገንዘብና ኢኮኖሚ ሚኒስትሩ ዶክተር አብርሃም እንዳሉት ኢትዮጵያ ከፍ ባለ ደረጃ ገቢ የመሰብሰብ አቅሟ ካልተሻሻለ እንዲህ ተሸጋሽጎና ተጣቦ የተያዘውን በጀት አግኝቶ ስራዎችን ለመከወን አስቸጋሪ ይሆናል፡፡ የአገሪቱ የገቢ አቅም ካላደገም የዜጎችን የእድገትና የልማት ፍላጎት ማሟላት ዳገት ይሆንብናል ሲሉ ተናግረዋል፡፡

 

ሚኒስትሩ ይሄንን ያሉት ከሕዝብ እንደራሴዎች አባላት ጋር ለ2011 ዓ/ም በተያዘው ረቂቅ በጀት ላይ ሲወያዩ ነው፡፡ መንግስት ከያዘው 346 ቢሊየን ብር ረቂቅ በጀት 60 በመቶውን እንደ መንገድ ፣ ጤና ፣ ንፁህ የመጠጥ ውሃ እና የምግብ ዋስትና ችግር ላለባቸው ዜጎች የሚሆን ልማታዊ ሴፍቲኔት ላሉ ድህነትን ለመቀነስ የሚያስችሉ ፕሮግራሞችን ለመከወን ነው፡፡

Share.

About Author

Leave A Reply