Tuesday, September 25

መድረክ አስቸኳይ የድርድር መድረክ እንዲዘጋጅ ጥሪ አቀረበ

Google+ Pinterest LinkedIn Tumblr +

በሥልጣን ላይ ያለው የኢትዮጵያ ሕዝቦች አብዮታዊ ዴሞክራሲያዊ ግንባር (ኢሕአዴግ) መራሹ መንግሥት ኢትዮጵያን ከገባችበት የፖለቲካ ቀውስ የመታደግ ብቃት የለውም ያለው ኢትዮጵያ ፌዴራላዊ ዴሞክራሲያዊ አንድነት መድረክ (መድረክ)፣ ኢሕአዴግን ጨምሮ ሁሉም ባለድርሻ አካላት በአስቸኳይ ተገናኝተው የሚነጋገሩበትና የሚደራደሩበት መድረክ እንዲፈጠር ጥሪ አቀረበ፡፡

መድረክ ይህን ጥሪ ያቀረበው፣ ‹‹ኢሕአዴግ አገራችንን ካስገባት ቀውስ ውስጥ የማስወጣት ብቃት አይኖረውም›› በሚል ርዕስ ባወጣው መግለጫ ነው፡፡ ሁሉንም ባለድርሻ አካላት ያሳተፈ የንግግርና የድርድር መድረክ የጠራበትን ምክንያት ሲያብራራ፣ ባለፉት 27 ዓመታት በአገሪቱ የፖለቲካ ሕይወት ውስጥ ልዩነቶች እየሰፉ መሄዳቸውና ቅራኔዎች እየተደራረቡ መጥተው ወደማይታረቁበት ደረጃ እየደረሱ በመሆኑ እንደሆነ ገልጿል፡፡

‹‹ከ2007 ዓ.ም. ምርጫ ማግሥት ጀምሮ በአገሪቱ የተለያዩ ሥፍራዎች ለተቀጣጠለው ሕዝባዊ የተቃውሞ ማዕበል በሕዝብ ዘንድ ተዓማኒነት ያገኘ ነፃና ፍትሐዊ የምርጫ ሥርዓት አለመኖር መሆኑ እየታወቀ፣ ኢሕአዴግ ለዚህ መሠረታዊ የአገሪቱ ፖለቲካ ችግር መፍትሔ ለማስገኘት የወሰደው ቁርጠኛ አቋም ያለመኖርና ለሕዝባችን የለውጥ ፍላጎት የሚመጥን ምላሽ ለመስጠት ዝግጁነትና ፍላጎት ያለማሳየቱ ነው፤›› በማለት አስቸኳይ የድርድር መድረክ እንዲጠራ የጠየቀበትን ምክንያት መድረክ  አስታውቋል፡፡

ሕዝብ መብቶቹን ለማስከበር ጥያቄ ለመንግሥት ለማቅረብ ሲንቀሳቀስ ተመጣጣኝ ያልሆነ የኃይል ዕርምጃዎች እየተወሰዱ፣ በከፍተኛ ደረጃ የሕዝብ ዕልቂት የተከሰተ በመሆኑና ይህንን ወንጀል በሚፈጽሙት አካላት ላይ ሕጋዊ ዕርምጃ እየተወሰደ አለመሆኑም፣ እንዲሁ የድርድር መድረክ እንዲዘጋጅ መድረክ ያቀረበው ሌላው ምክንያት ነው፡፡

‹‹ጠቅላይ ሚኒስትር ኃይለ ማርያም ደሳለኝ የአገሪቱ ሁኔታ እጅግ አስከፊ ደረጃ ላይ መድረሱን በማመን ሥልጣናቸውን ለመልቀቅ ለኢትዮጵያ ሕዝብ ይፋ ማድረጋቸውና ቀጥሎም ተገቢና ወቅታዊ ያልሆነ የአስቸኳይ ጊዜ አዋጅ ማወጁ፣ ኢሕአዴግ አገራችንን ካስገባት ቀውስ ውስጥ የማስወጣት ብቃት እንደሌለው ተጨማሪ ማሳያ ነው፤›› በማለት መድረክ አስታውቋል፡፡

ስለሆነም መድረክ ዴሞክራሲያዊ መንግሥት በሚቋቋምበት ሁኔታ ላይ ኢሕአዴግን ጨምሮ ሁሉም ባለድርሻ አካላት በአስቸኳይ ተገናኝተው የሚነጋገሩበትና የሚደራደሩበት መድረክ እንዲፈጠር ጥሪ ያቀረበ ሲሆን፣ ለስኬቱም የበኩሉን ጥረት እንደሚያደርግ አስታውቋል፡፡

ለዚህም መሳካት ለአጠቃላይ የኅብረተሰቡ ክፍል ጥሪ ያቀረበ ሲሆን፣ ዓለም አቀፉ ማኅበረሰብም ይህን ወሳኝ ጉዳይ ተገንዝቦ ሁሉም ወገን በዚህ አገር አድን አጀንዳ ላይ እንዲስማማ ባለው አግባብ ሁሉ ድጋፍ እንዲያደርግ መድረክ ጥሪውን አቅርቧል፡፡

ምንጭ፤ ሪፖርተር

Share.

About Author

Leave A Reply

ፈጣን ዜናዎችን በቴሌግራም ቻናላችን ያግኙ

Kaliti Press - The Fastest

JOIN OUR TELEGRAM CHANNEL CLOSE