fbpx

አድባራቷንና ቀሳውስቷን አቃጥላ… በብርሐን የተሞላ ዘመን ስታልም የነበረችው ሶማሊያ – (ጸሀፊ አሳዬ ደርቤ)

Google+ Pinterest LinkedIn Tumblr +

እንደ ደመራ አድባራቷንና ቀሳውስቷን አቃጥላ… በብርሐን የተሞላ ዘመን ስታልም የነበረችው ሶማሌ
(አሳዬ ደርቤ)
መንግስት አልባ ዜጎች
ከእምነታቸው ደጃፍ-
ሄደው ተጠለሉ፤
‹ሐያሉ ፈጣሪ
እንኳን ከአብዲ መንጋ
ከነብር መንጋጋ- ያድናል› እያሉ፡፡

ግና ያሉት አልሆነም
አልበጀም መጸለይ፤
ህግ-ከአብዲ በታች
አብዲ- ከህግ በላይ፤
እንደ ከደነጾር…

እንደ ዮዲት ጉዲት፤
አብዲ መግደል እንጂ
አያውቅም መራራት፤
ሰዎችን ሲማግድ
በለኮሰው አድባር፤
‹‹የምታምኑት አምላክ
እስኪ ያድናችሁ››
እያላቸው ነበር፡፡

በባለፉት ጊዜያት ሶማሌ ላይ እንደተከሰተው ያለ ግድያና መፈናቀል በየትኛውም የሃገራችን ክልል ላይ ታይቶ አያውቅም፡፡ ባንድ ወቅት ከክልሉ የተፈናቀሉ በሚሊዮን የሚቆጠሩ የኦሮሚያ ዜጎች እንባ ሳያባራ ከሰሞኑን ደግሞ በአብዱ ኢሌ ጭፍራ እልፍ አዕላፍ ዜጎቻችን በብሔራቸውና በሐይማኖታቸው እየተለዩ በጥይትና በእሳት ተቆልተዋል፡፡

ቀሳውስትና ዲያቆናት ከሚያገለግሉት ታቦት ጋር ተዳብለው በእሳት ዶግ አመድ ሆነዋል፡፡ በርካታ ዜጎቻችንም.. የእብዱን መሪ ምህረት፣ የመንግስትን ፈጥኖ ደራሽነትና የፈጣሪያቸውን አዳኝነት እየተጠባበቁ ማንም ሳይደርስላቸው በሶማሊያ ልዩ ሐይል ተጨፍጭፈዋል፡፡

ተሸኮርማሚው መንግስታችን የፌደራል ስርዓቱንና ህገ-መንግስቱን ላለመጣስ ሲጠነቀቅ… ለህገ-መንግስቱ ቀርቶ ለቅዱስ-ቁርዓን ተገዥ ያልሆነው ‹የ ሶማሌ ማፊያ› የሌላ ክልል ተወላጆችን እንዳሻው ማድረግ ቻሏል፡፡

የተዘረፈውን የግልና የመንግስት ድርጅቶች ሳንቆጥር… ቤቷን አቃጥላ ‹‹አሁን ገና በራልኝ›› እንዳለችው አብድ የአብዲ ኢሌ ጭፍራ ሰባት አብያተ-ክርስቲያናትን አቃጥሎ ‹‹መጭው ጊዜ ብሩህ ነው›› እያለ በደም ሲታጠብ ነበር፡፡
.
ትናንት በወር ደሞዛችን ቦንድ እየገዛን የአባይን ግድብ ስንገነባባት ከነበረው የቤኒሻንጉል ክልል ውስጥ የሚኖሩ ዜጎቻችን በርካታ ግፍ እንደተፈጸመባቸው ሁሉ… ዛሬ ደግሞ ገና ከዜና ግብዓትነት አልፎ ገንዘብ ማምረት ባልጀመረ ‹‹ድፍድፍ ነዳጅ›› የሰከረው ቡድን ከዚያ የከፋ ድርጊት ፈጸመ፡፡

ባለፈው የሚኖሩባትን ኢትዮጵያን ንቀው የገነጠሏትን ኤርትራን የሚናፍቁ አመራሮች መድረክ ላይ ሲሸልሉ እንዳየነው ሁሉ… ትናንት ደግሞ የነዳጅ ባለቤት ያደረገቻቸውን ኢትዮጵያን ሰንደቅ ዓላማ አቃጥለው የሶማሊያ ባንድራን የሚያውለበልቡ አመራሮች ሶማሌ ላይ ተመለከትን፡፡

ታዲያ ከእነዚህ ሁሉ ኬዞች የምንረዳው ነገር… በሱዳን አቋርጦ ግብጽ የሚገባውን ‹የአባይ ወንዝ› ከማቆም በፊት ኢትዮጵያ ውስጥ ሆኖ ‹‹ሱዳናዊ›› የሆነውን ዜጋ፣ ‹‹ኢትዮጵያዊ›› ማድረግ እንደሚቀድም ነው፡፡

በሶማሌ ከርሰ-ምድር ውስጥ ያለውን ነዳጅ ከማውጣት አስቀድሞ.. በገጸ-ምድሩ ላይ ከሚኖረውን ዜጋ ልብ ውስጥ ጥላቻንና ስግብግብነትን ማውጣት ቀዳሚ ተግባር መሆኑን ነው፡፡ ሲቀጥል ደግሞ መሪውን የሚመስለውን ‹ህዝብ› ከማስተካከል በፊት ማንንም የማይመስለውን አመራር ማነጽና መገንባት ያስፈልጋል፡፡

ከዚህ ውጭ ግን… ፍቀርና አንድነት ሳይኖር የሚገነባ ግድብም ሆነ ድልድይ ለመጠፋፋት እንጂ ለአንድነት ሊሆነን አይችልም፡፡ ሰላምና ሕብረት በሌለበት ሁኔታ የሚወጣ ነዳጅም… የጠብ ምንጭ እንጂ የገንዘብ ምንጭ አይሆነንም፡፡

ይሄን ሁኔታ ለማምጣት ደግሞ… እንደ አብዲ ኢሌ ያለውን… ‹በአመራርነት› ቀርቶ ‹በዜግነት› ሃጋራችን ላይ ሊኖር የማይገባውን የዛር-ፈረስ በማስወገድ… ከተቻለ የፌደራል መንግስቱን ካልሆነም ደግሞ አምላኩን የሚፈራ መሪ ማምጣት ግድ ይላል፡፡

መቼም በአብዲ የአመራርነት ዘመን ካየነው ግድያና መፈናቀል የከፋ ነገር በእሱ መወገድ ይከሰታል ብዬ አላስብም፡፡ ስለዚህም በዚህ ‹‹ስሜታዊ ጋኔን›› የሚመራው የሶማሊያ ሰራዊት ከልዩ ፖሊስነት ወደ አሸባሪ ድርጅትነት ሳይቀየር በፊት እስካሁን ለፈጸሙት ጥፋት ተመጣጣኝ እርምጃ በመውሰድ ክልሉንና አገሪቱን መታደግ ለነገ የማይባል ተግባር ይመስለኛል፡፡

Share.

About Author

Leave A Reply

ፈጣን ዜናዎችን በቴሌግራም ቻናላችን ያግኙ

Kaliti Press - The Fastest

JOIN OUR TELEGRAM CHANNEL CLOSE