fbpx

ወ/ሪት ብርቱካን ሚደቅሳ ነገ ኢትዮጵያ ይመለሳሉ

Google+ Pinterest LinkedIn Tumblr +

ከአንዴም ሁለት ጊዜ ለእስር ከተዳረጉ በኋላ የተፈቱትና መቀመጫቸውን አሜሪካ ያደረጉት የሕግ ባለሙያዋና የቀድሞ የቅንጅት ተቀዳሚ ምክትል ሊቀመንበር ወ/ሪት ብርቱካን ሚደቅሳ፣ ሐሙስ ጥቅምት 29 ቀን 2011 ዓ.ም. ማለዳ ወደ ኢትዮጵያ ይመለሳሉ፡፡

በወጣትነት ዕድሜያቸው የአገሪቱን ፖለቲካ ለመቀላቀል ይኖሩበት ከነበረው በተለምዶ ፈረንሣይ ለጋሲዮን ተብሎ በሚጠራው አካባቢ ወረዳ 12 እና 13 ምርጫ ክልል በግል ተወዳዳሪነት በ1992 ዓ.ም. አገራዊ ምርጫ መሳተፍ የጀመሩት ወ/ሪት ብርቱካን፣ በ1998 ዓ.ም. የቅንጅት ለአንድነትና ለዴሞክራሲ (ቅንጅት) ተቀዳሚ ምክትል ሊቀመንበር እንደነበሩ ይታወሳል፡፡

ከኢዲስ አበባ ዩኒቨርሲቲ በ1988 ዓ.ም. በሕግ ትምህርት የመጀመርያ ዲግሪያቸውን ያገኙት ወ/ሪት ብርቱካን፣ በፌዴራል የመጀመርያ ደረጃ ፍርድ ቤት ዳኛ በመሆንም ከ1989 ዓ.ም. እስከ 1990ዎቹ አጋማሽ ድረስ ከመሥራታቸውም በተጨማሪ፣ ለእስር እስከተዳረጉበት ጥቅምት ወር 1998 ዓ.ም. ድረስ ጠበቃና የሕግ አማካሪ ሆነው ሠርተዋል፡፡

ወ/ሪት ብርቱካን በፖለቲካ ተሳትፏቸው ዕውቅና ከማግኘታቸው በፊት፣ በ1993 ዓ.ም. ታዋቂው የሕወሓት/ኢሕአዴግ ታጋይና የቀድሞ የመከላከያ ሚኒስትር የነበሩት አቶ ስዬ አብርሃ፣ በሙስና ተጠርጥረው ከታሰሩበት የወንጀል ክስ በነፃ እንዲሰናበቱ በሰጡት የፍርድ ውሳኔ ታዋቂነት ማግኘታቸው ይታወሳል፡፡ ወ/ሪት ብርቱካን አቶ ስዬ በነፃ እንዲሰናበቱ የሰጡት ውሳኔ ተግባራዊ የሆነው፣ አቶ ስዬ የችሎቱን ቅጥር ግቢ በር እስከሚወጡ (ቅዱስ ጊዮርጊስ ቤተ ክርስቲያን ፊት ለፊት የሚገኘው አራዳ ችሎት) ድረስ ብቻ ነበር፡፡ አቶ ስዬ ከፍርድ ቤቱ ግቢ እንደወጡ በፖሊስ ተገድደው ወደ እስር መወሰዳቸውም አይዘነጋም፡፡

ወ/ሪት ብርቱካን ጠበቃና የሕግ አማካሪ ሆነው እየሠሩ፣ በእነ ብርሃኑ ነጋ (ፕሮፌሰር) የተመሠረተው ‹‹ቀስተ ደመና ኢትዮጵያ የዴሞክራሲና ማኅበራዊ ፍትሕ ንቅናቄ›› አባል በመሆን ሲሳተፉ ቆይተው፣ ግንቦት 7 ቀን 1997 ዓ.ም. በተደረገው ሦስተኛው አገር አቀፍ ምርጫ ከተወደዳደሩ በኋላ ፓርቲዎች ተዋህደው፣ ‹‹ቅንጅት ለአንድነትና ለዴሞክራሲ›› ፓርቲን ለመመሥረት ጥረት ካደረጉት መካከል ይጠቀሳሉ፡፡ በምርጫ ካሸነፉ ተወዳዳሪዎች አንዷ እንደነበሩም አይዘነጋም፡፡ የቅንጅት ተቀዳሚ ምክትል ሊቀመንበር ሆነው በተመረጡ ቀናት ውስጥ፣ ከሌሎች የቅንጅት አመራሮችና አባላት ጋር ታስረው በ1999 ዓ.ም. መጨረሻ ላይ በይቅርታ መፈታታቸው ይታወሳል፡፡

ወ/ሪት ብርቱካን ከእስር እንደተለቀቁ በዓመቱ ስዊድን ሄደው በነበሩበት ጊዜ ‹‹ይቅርታ አልጠየኩም›› የሚል መግለጫ በማውጣታቸው፣ በታኅሳስ ወር 2001 ዓ.ም. በድጋሚ መታሰራቸውና ለሁለት ዓመታት በማረሚያ ቤት ቆይተው መፈታታቸውም ይታወሳል፡፡ በዚህ ወቅት ‹‹ቃሌ›› በሚለው መለያቸው አይዘነጉም፡፡ ወ/ሪት ብርቱካን ከእስር እንደተፈቱ ወደ አሜሪካ ሄደው ላለፉት ሰባት ዓመታት ቆይተዋል፡፡ በቆይታቸውም በታዋቂው ሀርቫርድ ዩኒቨርሲቲ በሕዝብ አስተዳደር ሁለተኛ ዲግሪያቸውን ማግኘታቸው ታውቋል፡፡ ወ/ሪት ብርቱካን ወደ ኢትዮጵያ የሚመጡት በመንግሥት ጥሪ ተደርጎላቸው እንደሆነ ለማወቅ ተችሏል፡፡

በመንግሥት ጥሪ ወደ አገር ቤት ጠቅልለው ከተመለሱ ምናልባትም የኢትዮጵያ ብሔራዊ ምርጫ ቦርድ ሰብሳቢ፣ የኢትዮጵያ ሰብዓዊ መብት ኮሚሽነር፣ ወይም የፌዴራል የመጀመርያ ወይም የከፍተኛ ፍርድ ቤት ፕሬዚዳንት ተደርገው ሊሾሙ እንደሚችሉ ከወዲሁ ትንበያዎች እየተሰሙ ነው፡፡ ~ ሪፖርተር

Share.

About Author

Leave A Reply