fbpx

ፖሊስ ከስራ ማቆም አድማ ጋር በተያያዘ የያዛቸውን 9 ግለሰቦችን በአየር መንገዱ ላይ ከ70 ሚሊየን ብር በላይ ኪሳራ በማድረስ ጠርጥሯቸዋል

Google+ Pinterest LinkedIn Tumblr +

በኢትዮጵያ ሲቪል አቬዬሽን ባለስልጣን በስራ ማቆም አድማ የተጠረጠሩት 9 ግለሰቦች በኢትዮጵያ አየር መንገድ ላይ ከ70 ሚሊየን 944 ሺህ ብር በላይ ከሲራ ማድረሳቸውን መርማሪ ፓሊስ አስታወቀ።

መርማሪ ፓሊስ ቀሩኝ ያላቸውን ቀሪ የምርመራ ስራዎችን ለማጠናቀቅ የ14 ቀን ጊዜ እንዲሰጠው ጠይቋል።

በዛሬው ዕለት በፌዴራል የመጀመሪያው ደረጃ አራዳ ምድብ ተረኛ የወንጀል ችሎት በባለፈው ቀጠሮ ለፓሊስ በሰጠው የስምንት ቀን የምርመራ ጊዜ መነሻ በማድረግ የተሰሩ የምርመራ ስራዎችን፣ ቀሪ ምርመራዎችንና የተጠርጣሪዎችን አስተያየት አድምጧል።

በዚህ ወቅት መርማሪ ፓሊስ በተሰጠው ጊዜ በርካታ የሰነድ ማስረጃዎችን መሰብሰቡን በመጥቀስ በአየር መንገዱ ላይ የ70 ሚሊየን 944 ሺህ ብር ኪሰራ እንደደረሰም መረጃ መሰብሰቡን ለፍርድ ቤቱ አስታውቋል።

ፓሊስ ተጠርጣሪዎቹ አድማውን በተመለከተ ከተለያዩ መስሪያ ቤቶች ጋር የተለዋወጧቸው መልዕክቶችን ከብሄራዊ መረጃና ደህንነት ቢሮ ማግኘቱንና በክልል ከሚገኙ ቅርንጫፍ ሰራተኞች የምስክር ቃል መቀበል መጀመሩን ገልጿል።

የቀሩትን የክልል ምስክሮች ቃል ለመቀበል፣የደረሰውን ኪሳራ መነሻ ያደረጉ ሰፊ የምርመራዎችን ለማድረግ 14 ቀን ጊዜ ይሰጠኝ በማለት ፓሊስ ፍርድ ቤቱን ጠይቋል።

ተጠርጣረዎች በጠበቃቸው በኩልና በራሳቸው አንደበት የአየር መንገዱ ሰራተኛ እንዳልሆኑና የጠየቅነው መብትና ጥቅማችን ነው ፓሊስ ከዚህ ውጭ በማያያዝ በእስር ሊያቆየን ነው ብለዋል።

በተጨማሪም የሌሎችን ፊርማ አስመስሎ መፈረም በሌላ ወንጀል የሚያስጠይቅና ከዚህ ጋር የሚያያዝ እንዳልሆነ ለፍርድ ቤቱ ተናግረዋል።

ከዚህ በላፈ ቤተሰቦቻቸው በችግር ላይ እንደሆኑና ደመወዛቸው መታገዱን በመግለፅ ፍርድ ቤቱ ይህን ከግምት በማስገባት በዋስ እንዲለቃቸውና በስራ ላይ ሆነው ምርመራውን እንዲቀጥሉ ጠይቀዋል።

መርማሪ ፓሊስ በበኩሉ አየር መንገዱና ሲቪል አቬሽን ተመጋጋቢ መስሪያ ቤት መሆናቸውን በመግለፅ በምርመራው ከስራ ማቆሙ በስተጀርባ ሌሎች ጉዳዮች መኖራቸውን የሚያሳይ በመሆኑ ሰፊ ምርመራ ያስፈልጋል ብሏል።

ተጠርጣሪዎቹ የሀገሪቱ ሲቪል አቬሽን የአየር ክልል ለአደጋ የተጋለጠ መሆኑን ለተለያዩ ሀገራት መልዕክት ሲልኩ እንደነበረና ይህም በምርመራ የተገኘ መሆኑን ፖሊስ ለፍርድ ቤቱ ገልጿል።

እነዚህ ግለሰቦች በዋስ ቢወጡ ምስክር የሚያሸሹና ምርመራውን የሚያደናቅፉ በመሆናቸው ዋስትናውን ተቃውሟል።

የሁለቱን ክርክር የተመለከተው ፍርድ ቤቱ የተጠርጣሪዎችን የዋስትና ጥያቄ ውድቅ በማድረግ ለፓሊስ ለተጨማሪ ምርመራ የሰባት ቀን ጊዜ በመስጠት ለመስከረም 15 ተለዋጭ ቀጠሮ ይዟል።

በታሪክ አዱኛ

Share.

About Author

Leave A Reply

ፈጣን ዜናዎችን በቴሌግራም ቻናላችን ያግኙ

Kaliti Press - The Fastest

JOIN OUR TELEGRAM CHANNEL CLOSE