መንግስት ከተፈፀመው ግድያ ጋር በተያያዘ ጠረጠርኳቸው ያላቸው 6 ተጠርጣሪዎች የፍርድ ቤት ውሎ

Google+ Pinterest LinkedIn Tumblr +

የጦር መሳርያ በመያዝ በሚሊንየም አዳራሽ የመንግስት ባለስልጣናት ላይ ጥቃት ሊያደርስ ነበር የተባለው ሀየሎም ብርሀኔ የሟች ሜ/ጀ ገዛኢ አበራ ጠባቂ ነኝ በማለት በፍርድ ቤት ተከራከረ፡፡

የፌደራል ፖሊስ ከአማራ ክልል የመፈንቅለ መንግስት ሙከራ ጋር እና በአዲስ አበባ በከፍተኛ የጦር ሰራዊቶች ላይ ከተፈፀመው ግድያ ጋር በተያያዘ ጠረጠርኳቸው ያላቸውን 6 ተጠርጣሪዎች ትናንት በፌደራል የመጀመርያ ደረጃ ፍርድ ቤት አራዳ ምድብ ወንጀል ችሎት አቅርቧል፡፡
ከእነዚህም ውስጥ አንዱ የነበረው ሀየሎም ብርሀኔ የተባለው ግለሰብ ሰኔ 18 2011 ዓም ለኢፌድሪ ሀገር መከላከያ ሰራዊት ጠቅላይ ኢታማዦር ሹም ጄነራል ሰዓረ መኮንን እና ለቀድሞ የመከላከያ አባል ሜጀር ጀነራል ገዛኢ አበራ የአስክሬን ሽኝት በሚሊንየም አዳራሽ በሚደረግበት ወቅት 1 ክላሽንኮፍ ጠመንጃ እና 60 መሰል ጥይቶችን በመያዝ በሽኝት ስነስርዓቱ ላይ በተገኙት ከፍተኛ የመንግስት ባለስልጣናት ላይ ጥቃት ሊያደርስ ሲል ነው የተያዘው በማለት ፖሊስ ለፍርድ ቤቱ ገልፅዋል፡፡

የህሁን እንጂ ተጠርጣሪው ሀየሎም የሟች ሜ/ጀ ገዛኢ አበራ የግል ጠባቂ ነኝ እንደሚባለው ጥቃት ለማድረስ አይደልም የገባሁት፤ መሳርያውም የጥበቃ አካል ስለሆንኩ ነው የኖረኝ ሲል ለችሎቱ ለማስረዳት ሞክሯል፡፡
እሱ ተጠርጥሮ በቀረበበት በዚህ መዝገብ በተጨማሪም የአዲስ አበባ ባላደራ ምክርቤት ከፍተኛ አመራሮች እና አባላት ናቸው የተባሉት አቶ መርከቡ ሀይሌ ፣ አቶ ስንታየው ቸኮል እና አቶ ጌድዮን ወንደሰን ተካተዋል፡፡

እንዲሁም የዩኒቨርሲቲ መምህር የሆኑት አቶ ማስተዋል አረጋ እና ጋዜጠኛ በሪሁን አዳነ ተካተውበታል፡፡
ይሁን እንጂ ከሀየሎም ውጪ ባሉት አምስት ተጠርጣሪዎች ላይ ፖሊስ በአማራ ርዕሰ መስተዳደር ዶ/ር አምባቸው መኮንን ፣ በአማካሪያቸው አቶ እዘዝ ዋሴ እና በክልሉ ጠቅላይ አቃቤ ህግ አቶ ምግባሩ ከበደ ላይ የተፈፀመውን ግድያ እንዲሁም የተሞከረው መፈንቅለ መንግስት ላይ እጃቸው አለበት ሲል ነው ጠርጥሮ ያሰራቸው፡፡

በተጨማሪም በአዲስ አበባ የተገደሉት ጠቅላይ ኢታማዦር ሹም ጄነራል ሰዓረ መኮንን እና ሜጀር ጀነራል ገዛኢ አበራ ላይ የተፈፀመውን ድርጊት ከሌሎች ግብረዓበሮቻቸው ጋር በመተባበር እና በመቀናጀት የወንጀል ድርጊቱ ላይ ተሳትፈዋል በማለት ፖሊስ ለችሎት ገልፅዋል፡፡
በጦር መሳርያ በመታገዝ ለፈፀሙት የሽብር ወንጀልም ተጨማሪ ማስረጃዎችን ለማሰባሰብ በሽብር ህጉ መሰረት 28 ቀን እንዲሰጠው ችሎቱን ጠይቆ ተፈቅዶለታል፡፡

በአማራ ክልል የተሞከረውን መፈንቅለ መንግስት በማቀነባበር እና በመምራት የተጠረጠሩት ብ/ጄ አሳምነው ፅጌ የተገደሉ እና ስርዓተ ቀብራቸው ትናንት በትውልድ ከተማቸው ላሊበላ የተፈፀመ ሲሆን ከእሳቸው ጋር ተባብረዋል በሚል ተጠርጥረው በክልል ብቻ በቁጥጥር ስር የዋሉ ሰዎች ቁጥር ከ180 እንደሚበልጥ የክልሉ ፖሊስ ኮሚሽን ገልፅዋል፡፡

ዋዜማ ራዲዮ

Share.

About Author

Leave A Reply