ምክትል ጠቅላይ ሚኒስትር አቶ በአማራ ክልል ርዕሰ-መስተዳደር በዓለ ሲመት ላይ ያስተላለፉት መልዕክት

Google+ Pinterest LinkedIn Tumblr +

ውድ የሃገራችን ህዝቦች እና የአማራ ክልል ህዝብ የተከበሩ አቶ ተመስገን ጥሩነህ የአማራ ብሄራዊ ክልል ርዕሰ መስተዳደር በዚህ ታላቅ ፕሮግራም የታደማችሁ ርዕሳነ መስተዳድሮች ፕሬዚዳንቶች የተከበራችሁ የክልላችን ከፍተኛ የመንግስት የሥራ ሃላፊዎች የተከበራችሁ የሶማሌ ክልል ልዑካን ቡድን አባላት ጥሪ የተደረገላችሁ እንግዶች ክቡራት እና ክቡራን

ሁላችንም እንደምናስታውሰው ከዛሬ አምስት ወራት በፊት በዚህች ውብ ከተማ የወንድማችንን የዶር አምባቸውን በዓለ ሲመት ስነ-ስርዓት ላይ አብረን ታድመናል ከጥቂት ሳምንታት በፊት ደግሞ ማንኛችንም ባልጠበቅንበት ሁኔታ የጓደኞቻችንን ህይወት ስንነጠቅ በመሪር ሃዘን ውስጥ ወድቀን እንባ ተራጭተናል፡፡
ነገር ግን እንባ ተራጭተን ሃዘን በብርቱ ክንዱ ደቁሶን አንገታችንን ደፍተን አልቀረንም፡፡ አባቶቻችን ያወረሱንን ብልሃት ተጠቅመን የህዝባችንን ብርቱ የድጋፍ ድምፅ አክብረን የአማራ እናት ማህፀን የመሪ መካን አለመሆኗን ለማብሰር ዳግም ተገናኝተናል፡፡

ከሳምንታት በፊት ቅስም ሰባሪ ሃዘን ቢገጥመንም ከጥቁሩ ደመና በስተጀርባ አንዳች ተስፋ ይታየን ነበር፤ ዛሬም የአማራ ህዝብ ከሌሎቹ ወንድም ህዝቦች ጋር ሆኖ ለታላቅ የእናት ሃገር ግንባታ ይዋደቃል፡፡ የጀመርነው ትግል እንዲሁ በቀላሉ በጓዶቻችን ሞት የሚደናቀፍ ጉዞ እንዳልሆነ ሁሉም ሊያቀው ይገባል፡፡

የህዝባቸውን ህይወት ለማሻሻል ሌት ተቀን ሲውተረተሩ በአጭሩ የተቀጩ ጀግኖቻችን ሁሌም በልባችን የተፃፉ ፈርጦች እና አብነቶች ሆነው ይቀጥላሉ፡፡ ነገር ግን ከእነርሱ ህልፈት በኋላ ህይወት ይቀጥላል እና እነሆ በአዲስ የቁጭት መንፈስን ተነሳስተናል፡፡ አንዳንድ ፀሃፍት እንደሚሉት ህብረተሰብ የሚያገኘው የሚገባውን መሪ ነው፡፡ መሪዎች የቱንም ያህል ታላቅ ሃሳብ ቢፀንሱ ካልታገዙና ካልተበረታቱ እጀ-ሰባራ ይሆናሉ፡፡ መሪዎች ሲያጠፉም ጭምር የመሳሳት ዕድል በመስጠት በጊዜ ሂደት እየካበተ የሚመጣ የመሪነት አቅም እንዲገነቡ ልንፈቅድ ይገባል፡፡ መሪነት የልምምድ፣ የትጋት እና የመማር ውጤት እንደሆነው ሁሉ፤ መሪዎቹን የተረዳና ያላንዳች ስስት ትልልቅ ሃሳቦች ወደ ተጨባጭ ህልው ሃሳቦች እንዲቀየሩ የኔ የሚሉት ህብረተሰብ በእጅጉ ያስፈልጋቸዋል፡፡

በዚህ ዘመን ለመሪነት የተፈጠረ ሰው ብሎ ነገር የለምና በአሁን ጊዜ በመሪነት እየተሳተፍን ያለን አመራሮች ገና ከህጻንነት ጀምሮ ለመሪነት ተዘጋጅተን የመጣን አልጋ ወራሾች አይደለንም፡፡ ስለሆነም መሪዎች የሚነሱትም እና የሚወድቁት በህብረተሰቡ አሉታዊ እና አዎንታዊ ሚና በመሆኑ፤ ለመሪዎቻችን ስኬታማነት ህብረተሰቡ ከጎናቸው በመሆን አስፈላጊውን ሁሉ ሊያደርግ ይገባል፡፡

በረጅሙ ታሪካችን ውስጥ በእርካታ የሃዘን እና የፍስሃ ዘመናትን አይተናል፡፡ ተርበናል ታርዘናል በርካታ የደስታ ዘመናት አሳልፈናል ነፃነትም አስተምረናል፡፡ በአጭሩ አግኝተን አጥተናል፡፡ ነገር ግን በዚህ ረጅም የታሪክ ምዕራፍ ውስጥ ሁሌም የኛ ሆነው የቀጠሉ ቀንዲሎች አሉ፡፡ ከነዚህም ዋነኞቹ ሃቀኝነት እና የሞራል ልዕልና ናቸው፡፡ አንድ ህብረተሰብ ተሳስሮ የሚገመደው በሞራል እሳቤዎቹና እሴቶቹ ነው፡፡ ትክክል እና ስህተት ወይም እውነት እና ሃሰት ብለን በነገሮች ላይ ግለሰባዊ እና ማህበረሰባዊ ብያኔዎችን የምናሳልፈው በእነዚህ አስተሳሰቦች ላይ ተመርኩዘን ነው፡፡ የሞራል እሳቤዎቻችን እና እሴቶቻችን የማህበረሳበዊ ጉዞ መነሻ እና መድረሻ የሚያሳዩ ካርታዎች ናቸው፡፡ አንድ ህብረተሰብ እነዚህን ያጣ ዕለት መነሻ እና መድረሻውን ሳያቅ ወደ ሩቅ ሃገር ለማቅናት የተነሳ ቅጣንባሩ የጠፋበት ማህበረሰብ ነው የሚሆነው፡፡

የአማራ ህዝብ ለዘመናት ከትውልድ ወደ ትውልድ ሲተላለፍ የመጣ የሞራል እሳቤዎች እና እሴቶችን የተላበሰ ማህበረሰብ ነው፡በመሆኑም ያጋጠመንን ከባድ ችግር ኪሳራን በእጅጉ በሚቀንስ እና ማህበረሰቡን ከሚከፋፍሉ ነገሮችን ራሱን ጠብቆ በጋራ ለመቆም አስችሎታል፡፡ ነገር ግን እነዚህ የህልውና እና የማንነታችን መሰረት የሆኑ አንጡራ ሃብቶቻችን ነቅተን ካልጠበቅናቸው በዋዛ ፈዛዛ ከዕጃችን ሊወጡ ይችላሉ፡፡ በዚህ ወቅት በጥቂቱም ቢሆን ከሩቁ እየታዩ ያለው ምልክት የሞራል እሳቤዎቻችን እና እሴቶቻችን መሸርሸር ጠቋሚ ምልክቶች ናቸው፡፡ ይህንን አዝማምያ ገና ከማለዳው ልናርመው ይገባል፡፡

ክቡራት እና ክቡራን እንደ ሃገር  ምንም እንኴ የዚህ ቀጠና ዝሆን ብንሆንም አንድም ሃገር ወረን አናውቅም፡፡ ለወራሪዎችም አልተደፈርንም፡፡ ይሄ እውነታ በረጅም ታሪካችን ውስጥ ለሞራል ልዕልና ያለንን ቦታ በደማቁ ይናገራል፡፡ ይሄ በውድ ዋጋ የጠበቅነውና ከነጣቂዎችም ጭምር እየተከላከልን የኛ አድርገን ያቆየነው እሴት ውስጣዊ አንድነታችንን በማጠናከር ለትውልድ ልናሻግረው ይገባል፡፡መገዳደልን ቅቡል የሚያደርግ አስተሳሰብ በእንጭጩ ካልተቀጨ፤ ነገ ማህበረሳበዊ ባህል ሆኖ የእያንዳንዳችንን ጓዳ ማንኳኳቱ አይቀርም፤ ስለዚህ ሁኔታ ጊዜ ሳይሰጠው ልናስቆመው ይገባል፡፡ ይልቁኑም! ዳር እስከ ዳር ለዜጎች የተመቸች፤ እኩልነት የሰፈነባት፤ እና ዲሞክራሲ ያበበባት ሃገር የመገንባት ራዕይ ሰንቆ መጓዝ ይጠይቃል፡፡

ክቡራትና ክቡራን በአመራር ታሪክ የቅብብሎሽ ሰንሰለት ውስጥ በአስጨናቂ እና በአስቸጋሪ ጊዜ ሃገራቸውን ከማጥ መንጥቀው በመታደግ ወደ ብልፅግና ጎዳና የሚወስዱ የጨለማ ጊዜ ብርሃኖች፤ የለውጥ አቀጣጣይ ኮኮቦች ያስፈልጓታል፡፡ በኛ ምድር የተፈጠሩት ታላላቆቹ የሃገራችን መሪዎች ባልተመቸ ሁኔታ ውስጥ አልፈው ታላቅ ሃገር አስረክበውናል፡፡ ዛሬ በእርግጥም ከትናንት የተሻለ ቢሆንም መልካም አጋጣሚዎችና ተግዳሮቶች እየተጠላለፉ አገራችንን እና ክልላችንን እየተፈታተኑ ስለሆነ ትናንት ያጣናቸውን መሪዎች የሚተኩ አመራሮች መተካት የማይቀር የቤት ስራችን ነው፡፡ እነሆ ዛሬም ክልላችን የአመራር መካን ባለመሆኗ የአመራሮቻችንን ህልፈት ተከትሎ የተፈጠረብንን የአመራር ጉድለት ለሟሟላት ተኪ አመራሮችን የሟሟላት ስራ አከናውነናል፡፡ በዚህ ወሳኝ የጉዞ ምዕራፍ ላይ እነ አቶ ተመስገን ፣ አቶ ዮሃንስ እና ጓደኞቻቸው ይህንን ታሪካዊ ሃላፊነት ከህዝቡ ጋር እጅ ለእጅ ተያይዘው በስኬት እንደሚወጡ ሙሉ እምነት አለኝ፡፡

የብርቱ የአማራ አርሶ አደር ልጆች የሆኑት አቶ ተመስገን ጥሩነህ እና ጓደኞቻቸው ባለፉት ዓመታት በተሰማሩበት በተግባር የተፈተኑ፤ በቀጣይ የክልላችንን ህዝብ ስጋት ፍላጎት እንዲሁም ቋሚ ጥቅም ለማስከበር ታጥቀው የተነሱ ናቸው፡፡ በዚህ ወቅት ተኪ አመራሮቹ የተጣለባቸውን ታሪካዊ ሃላፊነት በውጤታማነት እንዲወጡ እና ከፊት ለፊት ለሚጠብቀን ብርቱ የለውጥ ጉዞ ስኬታማ እንዲሆኑ የለውጥ ተዋናይ ከጎናቸው እንዲሰለፍ አደራ እላለሁ፡፡

ክቡራት እና ክቡራን በመጨረሻም በወንድሞቻችን ላይ በደረሰው ያልታሰበ ጥፋት ተከትሎ ክልላችን ከተጋረጠበት የሰላም እና የፀጥታ ስጋት በፍጥነት አገግሞ መደበኛ ህይወት በተስፋ እንዲያንሰራራ ለተረባረባችሁ የክልላችን ህዝቦች፤ የፌዴራል እና ክልል ፀጥታ አካላት እና ወንድም የክልል ህዝቦች እና ርዕሰ መስተዳድሮች ከልብ እያመሰገንኩ፤ ለአዲስ አመራሮች ውጤታማ
የስራ ዘመን እንዲሆንላችሁ እመኛለሁ፡፡

Share.

About Author

Leave A Reply