በምዕራብ ኦሮሚያ ተፈናቃዮች ወደ ቀያቸው በመመለሳቸው 45 የመጠለያ ካምፖች ተዘጉ

Google+ Pinterest LinkedIn Tumblr +

ከቤኒሻንጉል ጉሙዝ ክልልና ከአዋሳኝ የኦሮሚያ ክልል ዞኖች የተፈናቀሉ ዜጎች ወደ ቀያቸው በመመለሳቸው የመጠለያ ካምፖች እየተዘጉ መሆኑን የኦሮሚያ ክልል መንግስት ኮሙዩኒኬሽን ጉዳዮች ቢሮ አስታወቀ።

የክልሉ መንግስት ኮሙዩኒኬሽን ጉዳዮች ቢሮ ኃላፊ አቶ አድማሱ ዳምጠው ለፋና ብሮድካስቲንግ ኮርፖሬት እንዳስታወቁት፥ በተለያየ ምክንያት ከቤት ንብረታቸው የተፈናቀሉ ዜጎችን መልሶ የመቋቋም ስራ ተጠናክሮ ቀጥሏል።

በዚህም ከቤኒሻንጉል ጉሙዝ ክልል ተፈናቅለው በምስራቅ እና ምእራብ ወለጋ ዞኖች ውስጥ ተጠልለው የነበሩ 82 ሺህ 823 ዜጎችን ወደ መኖሪያቸው ለመመለስ መሰራቱን ገልፀዋል።

ከእነዚህ ውስጥም እስካሁን ባለው ጊዜ 66 ሺህ 652 ዜጎችን ወደ መኖሪያ ቀያቸው መመለስ መቻሉን አስታውቀዋል።

በተመሳሳይ በፀጥታ ስጋት የቤኒሻንጉል ጉሙዝ ክልል አዋሳኝ አካባቢ ከሆኑት ምስራቅ ወለጋ፣ ምዕራብ ወለጋ እና ሆሮ ጉዱሩ ወለጋ ዞኖች ተፈናቅለው የነበሩ 71 ሺህ 355 ዜጎችን መልሶ የማቋቋም ስራ መሰራቱንም ገልፀዋል።

በተሰራው ስራም 63 ሺህ 15 ዜጎችን ወደ መኖሪያ ቀያቸው መመለስ መቻሉን ነው አቶ አድማሱ ያስታወቁት።

በዚህም ምክንያት ዜጎቹ በተፈናቀሉበት ጊዜ ተጠልለውበት ከነበሩት 51 መጠለያ ጣቢያዎች ውስጥ በ45 የመጠሊያ ካምፖች ሙሉ በሙሉ መዘጋታቸውን ገልፀዋል።

በቀጣይም ወደ መኖሪያቸው ያልተመለሱ ተፈናቃይ ዜጎችን የመመለሱ ስራ ቅድሚያ ተሰጥቶት የሚሰራ መሆኑን ነው አቶ አድማሱ ያስታወቁት።

አቶ አድማሱ አክለውም፥ የክልሉ መንግስት በህዝቦች መካከል ያለውን የወንድማማችነት ትስስር የበለጠ ለማጠናከር ትኩረት ሰጥቶ እየሰራ ይገኛል ብለዋል።

በዚህም በህዝቦች መካከል ያለውን ግንኙነት በማጠናከር የኦሮሚያ ክልልን አንዲሁም የኢትዮጵያን ሰላም ለማስጠበቅ የሚሰራ ይሆናል ነው ያሉት።

FBC

Share.

About Author

Leave A Reply