የመናኸሪያዎች ሥርዓት አልበኝነት መንገደኞችን እያስቸገረ ነው፡፡

Google+ Pinterest LinkedIn Tumblr +

በሕዝብ ትራንስፖርት ሥምሪት ኃላፊነታቸውን አልተወጡም በተባሉ 33 ባለሙያዎች ላይ እርምጃ እንደተወሰደ የአማራ ክልል መንገድ እና ትራንስፖርት ቢሮ አስታውቋል፡፡

በአማራ ክልል የደረጃ አንድ፣ የደረጃ ሁለት እና የደረጃ ሶስት ተሸከርካሪዎች ስምሪት አገልግሎት መስጫ 2 መቶ 9 መናኸሪያዎች እንደሚገኙ ከቢሮው ያገኘነው መረጃ ያሳያል፡፡ መናኸሪያዎቹ ደንበኛችን በአግባቡ እንዲያገለግሉ ለማድረግም ህግና ስርዓት የሚያስከብሩ ሙያተኞች ተመድበውላቸዋል፡፡ ባለሙያዎቹም የመጓጓዣ ክፍያ ተመንን ይቆጣጠራሉ፤ የተሽከርካሪ መውጫ ፍቃድ እና የሌሎችንም አሠራሮች ህጋዊነት ይቆጣጠራሉ፡፡ ይሁን እንጅ ይህ ሲከበር አይስተዋልም፤ በዚህም መንገደኞች እንግልት እየደረሰባቸው፣ ከመደበኛው የመጓጓዣ ክፍያ በላይም እየተጠየቁ እንደሆነ ለአአብመድ ተናግረዋል፡፡ ዛሬ ጠዋት በባሕር ዳር ከተማ አስተዳደር ነባሩ የአውቶቡስ መናኸሪያ ተገኝቶ አሠራሩን የታዘበው ባልደረባችን አብርሃም በዕውቀት ያረጋገጠው እውነታም የተገልጋዮችን ቅሬታ የሚያጠናክር ነው፡፡

ለአብነትም ሐምሌ 10/2011 ዓ.ም ጠዋት 12:00 መናኸሪያው ሲከፈት ወደ ጎንደር ለመሄድ መኪና ውስጥ የገቡ መንገደኞች በታሪፍ ‹‹ጨምሩ አልጨምርም›› ክርክር እስከ ረፋድ 1:35 መንገድ አልጀመሩም ነበር፡፡ በደረጃ አንድ ተሸከርካሪ ከባሕር ዳር ወደ ጎንደር መሄድ የሚፈልጉ መንገደኞች በታሪፉ መሰረት ‹‹85 ብር›› መክፈል ይጠበቅባቸው ነበር፤ ነገር ግን የክፍያ መጠኑ የመጫን ስልጣን ለራሳቸው በሰጡ አሽከርካሪዎች ተወስኖ ተገልጋዮች 1መቶ ብር እንዲከፍሉ ተደርጓል፡፡

መንገደኞቹ ድርጊቱን በቦታው ለነበረ የትራፊክ ፖሊስ ቢያሳውቁም እንዲያስተካክሉ ረዳትና ሾፌሩን መክሮ ከመሄድ ያለፈ እርምጃ አለመውሰዱን ነው ዘጋቢያችን የተመለከተው፡፡

አብዛኛዎቹ አሽከርካሪዎች ከኋላ ወንበር አምስት ሰዎችን መጫን ሲገባቸው ሰባት ሰዎችን፣ ሁለት ሰዎችን ከሚይዙ ወንበሮች ደግሞ ሦስትና አራት ሰዎችን ጭነው ከመናኸሪያ ሲወጡ ይስተዋላሉ። ከወንበሮቹ በተጨማሪ የገመድና የቆዳ አነስተኛ መቀመጫዎችን (ኩርሲዎችን) ተጠቅሞ ትርፍ መጫንም የተለመደ ነው። እንደ ‹‹ኮስትር›› ያሉት ደግሞ ከተፈቀደላቸው የወንበር ብዛት ውጭ ተጨማሪ ወንበሮችን አሰርተው ከልክ በላይ ሲጭኑ መመልከት ተለምዷል፡፡

ከመናኸሪያው ውስጥ የስምሪት ሠራተኞች ቢኖሩም መውጫ ከመቁረጥ ውጭ ቁጥጥር እንደማያደርጉ ተመልክተናል። በተጨማሪም ተሽከርካሪዎች መስመር ቀይረው ከታሪፍ በላይ በመጠየቅ እንደሚሰጡም ነው ተሳፋሪዎች የተናገሩት፡፡

የዛሬ ትዝብታችን በባሕር ዳር ከተማ አስተዳደር ነባሩ የአውቶቡስ መናኸሪያ ያለውን እንቅስቃሴ ይሁን እንጅ የአብዛኛዎቹ የክልሉ መናኸሪያዎች አገልግሎት አሰጣጥ ከዚህ የዘለለ አለመሆኑን በተለያዩ ጊዜያት ዘግበናል፡፡

የአማራ ክልል መንገድ እና ትራንስፖርት ቢሮ የትራንስፖርት አገልግሎት አቅርቦት ዳይሬክተር አቶ ደመላሽ ስንሻው አብዛኛዎቹ የችግሩ መንስኤዎች ከመናኸሪያ ሰራተኞች ሙያዊ ስነ ምግባር ጉድለት ጋር እንደሚያያዙ ነው የተናገሩት፡፡

ከዚህ ጋር በተያያዘም ኃላፊነታቸውን አልተወጡም በተባሉ 33 ባለሙያዎች ላይ እርምጃ እንደተወሰደ አቶ ደመላሽ ገልጸዋል፡፡ ተሸከርካሪዎች መያዝ ካለባቸው ተሳፋሪዎች ግማሽ ያህሉን ሳይዙ መውጫ መስጠት፣ መናኸሪው ውስጥ ትርፍ ጭነው ሲወጡ ተጠያቂ አለማድረግ፣ ከህጋዊ ክፍያ በላይ እንዲከፍሉ ተጠይቀው አቤቱታ የሚያሰሙ መንገደኞችን አለማስተናገድ ቅጣት የተላለፈባቸው ባለሙያዎች ፈፅመዋቸዋል የተባሉ የስነ ምግባር ግድፈቶች ናቸው፡፡

በሌላ በኩል በዘርፉ እስከ ወረዳ ድረስ የተቋቋሙ የትራንስፖርት ተቋማት የመፈፀም አቅም ዝቅተኛ መሆን የመናኸሪያዎች አገልግሎት አሰጣጥ እንዲላላ እና ኢ-ፍትሃዊ አሠራር እንዲኖር ምክንያት እንደሆነ ታውቋል፡፡

በባሕር ዳር አዲሱ መናኸሪያ፣ በደብረ ታቦር፣ በጎንዳር ደግሞ በአዘዞ እና አራዳ መናኸሪዎች ታሪፍ በመጨመር እና በሌሎች ምክንያቶች በደንበኞች ላይ እየደረሰ ያለውን እንግልት ለመቀነስ የሚያስችል የአንድ ማዕከል ‹‹የትኬት ኮሪደር›› አሠራር ተሞክሮ ወደ ሌሎች አካባቢዎች ለማስፋት እየተሰራ እንደሚገኝ ተገልጧል፡፡

Share.

About Author

Leave A Reply