የአልኮል ማስታወቂያዎችን ማሰራጨት፣ የትንባሆና የሺሻ ምርቶችን ማዘዋወር፣ መሸጥና ማስጠቀም እስከ 2 መቶ ሺህ ብር ያስቀጣል።

Google+ Pinterest LinkedIn Tumblr +

የአልኮል ማስታወቂያዎችና በተከለከሉ የትንባሆና የሺሻ ምርቶች ዝውውርና ሽያጭ ላይ የሚደረገውን ቁጥጥር ህብረተሰቡ እንዲያግዝ የምግብና መድኃኒት ቁጥጥር ባለስልጣን ጠየቀ።

የባለስልጣኑ የሕግ አማካሪ አቶ ደረጄ ሽመልስ ለኢዜአ እንደተናገሩት በአዋጅ ቁጥር 1112/2011 አንቀጽ 60 ንዑስ አንቀጽ አራት እና አምስት፣ እንዲሁም በአንቀጽ 49 ንዑስ አንቀጽ አምስት ላይ ስለ ቁጥጥሩ የተቀመጡ የተለያዩ ድንጋጌዎች አሉ።

ለተፈፃሚነቱም ባለስልጣኑ ከአዲስ አበባና ከፌዴራል ፖሊስ፣ ከደንብ ማስከበር፣ ከክልሎች፣ ከከተማ መስተዳደሮችና ሌሎች ባለድርሻ አካላት ጋር በመሆን የቁጥጥር ሥራዎችን በማከናወን ላይ ይገኛል ብለዋል።

በአዋጁ አንቀጽ 60 ንዑስ አንቀጽ አራትና አምስት “ማንኛውንም የአልኮል ምርት በብሮድካስት አማካኝነት ማስተዋወቅ የተከለከለ መሆኑንና የአልኮል መጠጥን ከሎተሪ ዕጣ ወይም ከሽልማት ጋር በማንኛውም መንገድ በማያያዝ ወይም አልኮልን በቢልቦርድ የማስተዋወቅ ተግባር መከልከሉን” አስረድተዋል።

በአንቀጽ 49 ንዑስ አንቀጽ አምስት ደግሞ የሺሻን ምርት ማምረት፣ ወደ ሀገር ማስገባት፣ ማከፋፈል፣ ለሽያጭ ማቅረብ ወይም መሸጥ የተከለከለ ነው።

ሺሻንም ሆነ ማንኛውንም ዓይነት የትምባሆ ምርት ለማስጨስ ወይም ለማስጠቀም የሚዘጋጅ የንግድ ሥራ መገደቡንም አቶ ደረጄ ገልፀዋል።

ከአዲስ አበባና ከፌዴራል ፖሊስ፣ ከደንብ ማስከበር፣ ከክልሎች፣ ከከተማ መስተዳደሮች እና ከሌሎች ባለድርሻ አካላት የተወጣጣ ግብረ ሃይል በማቋቋም አዋጁን ተፈጻሚ የማድረግ ሥራ እንደተጀመረም ነው የገለፁት።

ሕጉን የማስከበሩ ሥራ ተጠናክሮ የሚቀጥል መሆኑን የተናገሩት የሕግ አማካሪው ኅብረተሰቡ በድርጊቱ ባለመሳተፍ እና የሺሻ ምርት የሚያመርቱ፣ ወደ ሀገር የሚያስገቡ፣ የሚያከፋሉ፣ ለሽያጭ የሚያቀርቡ ወይም ሺሻንም ሆነ ማንኛውንም ዓይነት የትምባሆ ምርት የሚያስጨሱ አካላትን በነፃ የስልክ መስመር 84 82 ጥቆማ በመስጠት ትብብር እንዲያደርግ ጠይቀዋል።

አዋጁ በክፍል ስምንት አንቀጽ 65 ንዑስ አንቀጽ 23 ላይ “ማንኛውም ሰው የተከለከለ ይዘት ያለው ትምባሆ ወይም በሕገ ወጥ መንገድ የገባን ምርት ሺሻን ወይም የኤሌክትሮኒክ ኒኮቲን መስጫ መሳሪያን ወይም ሌላ ከሲጋራ ጋር ተመሳሳይ የሆነ ለኒኮቲን መስጫ የሚያገለግል የቴክኖሎጂ ምርት ያመረተ፣ ወደ ሀገር ውስጥ ያስገባ፣ ያከፋፈለ፣ ያከማቸ ወይም የሸጠ እንደሆነ ከሦስት ወር እስከ ሦስት ዓመት በሚደርስ እስራት እና ከብር 1 ሺህ እስከ 2 መቶ ሺህ ይቀጣል” ሲል ያትታል።

አብመድ

Share.

About Author

Leave A Reply