ፕሬዚዳንት ሳህለወርቅ ዘውዴ ኢቫንካ ትራምፕን አነጋገሩ

Google+ Pinterest LinkedIn Tumblr +

ፕሬዚዳንት ሳህለወርቅ ዘውዴ በኢትዮጵያ የሁለት ቀናት ጉብኝት ለማድረግ አዲስ አበባ የምትገኘውን የአሜሪካውን ፕሬዝደንት ልጅ ኢቫንካ ትራምፕን አነጋገሩ፡፡

በዙሁ ወቅትም ፕሬዚዳንት ሳህለወርቅ፥ በፕሬዚዳንት ትራምፕ የተቀረጸውና በዓለም ላይ ያሉ ሴቶችን ለመደገፍ ያለመው ኢንሽየቲቭ ጥሩ እርምጃ መሆኑን ገልፀው፤ ፕሮግራሙ ሴቶችን ማዕከል እስካደረገና ከፍ ወዳለ ደረጃ የሚያሸጋግር እስከሆነ ድረስ ተቀባይነት የሚኖረው ነው ብለዋል፡፡

ኢትዮጵያ የሴቶችን አቅም ለማጎልበት በአዲስና በተለየ የለውጥ አቅጣጫ እየተንቀሳቀሰች መሆኑን ያነሱት ፕሬዚዳንቷ፥ በተለይም ሴቶች ወደ ከፍተኛ ትምህርት ተቋማት ከገቡ በኋላ የሚያጋጥሟቸውን ችግሮች በመፍታት ትምህርታቸውን በስኬት ጨርሰው እንዲወጡ ለማድረግ በሚቻልባቸው መንገዶች ላይ ትኩረት መደረጉን ነው ያብራሩት።

በሴቶች ዙሪያ ከሚሰሩ መንግስታዊ ያልሆኑ ድርጅቶችንም ጋር በመቀናጀት የተሻለ ስራ መፈጸም የሚቻልባቸው ጉዳዮችም ላይ በስፋት እንደሚሰራበት ጠቅሰዋል፡፡

ኢቫንካ ትራምፕ በበኩሏ፥ ፕሬዚዳንት ዶናልድ ትራምፕ በዓለም ላይ እስከ 2025 ድረስ 50 ሚሊዮን ሴቶችን ተጠቃሚ የሚያደርግ ኢኒሽየቲቭ ይፋ ማድረጋቸውን አስታውሳለች።

ይህ ባለፈው የካቲት ወር ይፋ የተደረገው ፕሮግራም በሶስት መሰረታዊ ጉዳዮች ላይ እንደሚያተኩር የገለጸችው ኢቫንካ ትራምፕ፥ የሴቶችን አቅም ማጎልበት፣ የሴቶችን የሥራ ፈጣሪነት እድል ማስፋትና ለሴቶች አጋዥ የሆኑ ህጎችና ደንቦችን ማጠናከር የሚሉት የፕሮግራሙ ማጠንጠኛዎች እንደሆኑ አብራርታለች።

ከዚህም አንጻር በኢትዮጵያ የሴቶችን ተሳትፎና ተጠቃሚነት ለማጎልበት የሚከናወኑ ተግባራት የሚደነቁ መሆኑን የጠቀሰችው ኢቫንካ ትራምፕ ይህን ሂደትም አሜሪካ በተለያየ መንገድ እንደምትደግፈው ተናግራለች፡፡

በአጠቃላይ ኢትዮጵያ በሁሉም መስክ የተያያዘችውን የለውጥ ሂደትም አስደናቂ መሆኑን መግለጿን ከፕሬዚዳንት ጽህፈት ቤት ያገኘነው መረጃ ያመለክታል።

Share.

About Author

Leave A Reply